Gogoetak tantaka: KAPITALISMOAREN PORROTA IRITSI ZAIGU

Weimarreko Errepublika garaiko billeteak, 1927ko hiperinflazioa

España ez omen zegoen krisian, Zapaterok Españako ekonomia munduko sendoena dela dio, Jaurlaritzak EAEko ekonomia Españakoa baino sendoagoa dela dio (ba al da egun euskal ekonomiarik?)…

Sirena abestiak baino ez dira, gezurrak, banketxeetatik dirua ateratzen hasten bagara porrota azkartuko litzatekeelako, eta porrota, beraiek diseinatu dutenez, beraiek erabakitzen dutenean izanen da. Gezurrak direla diot, batez ere krisi honek zer pentsatzeko ezaugarriak baititu: bat, krisia mundu mailakoa da, globala, AEBetan irailak 11 ekonomikoa izenarekin izendatu dute; eta lurrikara ekonomiko honen epizentroa AEBetan izan da. Bi, AEBetan hain egoera ekonomiko larria gertatzen ari den une berean hauteskunde kanpainan daude, hain zuzen arazo gutxi konpontzen eta promesa asko egiten diren garaian. Bi ezaugarri hauei so egite hutsak izu ikara beldurgarria sortzen du.

Atzokoan, sarean Lyndon LaRouche AEBetako ekonomilari eta estadistak krisiari buruzko konferentzia bat entzun nuen. Gizon honek, duela bi urte egun bizi dugun egoeraz ohartarazi zuen ekonomilari bakarra izan zen. Bere hitzaldian, hainbat xehetasun beldurgarri aipatzen ditu.

Krisia ez dela hipoteka krisi hutsa, esaten duten bezala, Munduko Ekonomia Sistemaren bankarrota baizik, munduko ekonomia kiebran ei dago. AEBetan hartu diren erreskate neurriak, krisia azkartzeko baino ez dutela balio dio, sua gasolinarekin itzaltzea bezala. Duela bi urte, berak egoeraz ohartarazi eta egoera bideratzeko proposatu zituen neurrien aurka oldartu ziren haiek, egun erreskate neurriak proposatu dituzten berberak direla. Eragindako krisi bat izan dela. Eta asteetako gauza dela, Alemaniak Weimarreko Errepublikaren garaian, 1927an bizi izan zuen krisiaren antzeko egoeran aurkitu gaitezke. Izugarrizko hiperinflazio egoera batetan, non ogia erosteko herritarrak billetez beteriko poltsekin ibili behar zuten.

Hau ez da txantxa, egoera benetan larria da, eta egunetik egunera larritasun hori gertuagotik senti dezakegu. Oroitzen zarete "Korralitoaz", klase ertainaren diru guztia lapurtu aurretik, peso 1 dolar 1 politikekin, dirua zutenak oparo bizi ziren, burubuila espekulatiboari esker, herritar ugari pobrezian zegoen bitartean. Halako batean, banketxeek ateak itxi eta lapurreta etorri zen, lapurreta eta istiluak, istiluak eta hildakoak, zaurituak, eta herritarren erdia pobrezian. Inork espero ez zuenean, ezaguna egiten zaizue? herritarren multzo handi bat, 5o urteko hipoteketara lotu dute, zorrak gurasoetatik semeetara igaroz. Zenbateko kuota ordaintzen hasi ziren? Eta zenbatekoa ordaintzen amaituko dute?

Berriz ere beldurra sartzen ari zaizkigu. Oraingoan, mehatxua terrorismo ekonomikoa da. Porrota sortu dutenak, orain, "konponbidea" eskeintzen ari zaizkigu, Munduko Finantza Orden Berria, Munduko Orden Berriaren esklabutzarako beste urrats bat. Ez da txantxa!